Azərbaycan Respublikasının Prezidenti İlham Əliyevin 11 yanvar 2016-cı il tarixli sərəncamına əsasən 2016-cı ilin “Multikulturalizm ili” elan edilməsindən sonra, ölkəmizdə multikulturalizm anlayışının siyasi, fəlsəfi və sosioloji baxımdan öyrənilməsinə yönəlmiş müxtəlif elmi, akademik, publisistik və s. istiqamətli araşdırmalar aparılmağa başlandı. Bu araşdırmaları ümumi olaraq nəzərdən keçirəndə görürük ki, əsasən, Azərbaycanda və dünyada multikulturalizm təcrübəsinin öyrənilməsi, Azərbaycan multikulturalizminin spesifik xüsusiyyətləri və əsas elementləri, milli multikulturalizm modelinin təbliği və s. mövzuları əhatə edir. Əlbəttə, qeyd olunan mövzuda aparılan araşdırmalar, elmi və ya publisistik məqalələr və monoqrafiyalar içərisində sanballı əsərlərə də rast gəlinir, lakin multikulturalizmin sırf siyasət fəlsəfəsi, siyasi nəzəriyyə, eyni zamanda sosioloji bir reallıq kimi empirik qiymətləndirilməsi məsələsinə gəlincə, bu mövzuda boşluqların olduğu da nəzərə çarpmaqdadır. Bu baxımdan, qeyd edilməlidir ki, prof. Etibar Nəcəfovun “Multi-kulturalizmin sosial-fəlsəfi təhlili” adlı monoqrafiyası multikulturalizmi həm siyasi fəlsəfə, həm də sosioloji hadisə kimi nəzərdən keçirən azsaylı elmi-tədqiqat əsərlərindən biridir.